Esti blogue ñaz col enfotu d'asoleyar les esploraciones soterrañes desendolcaes por la S.E.B. Escar y estremaos grupos d'espeleoloxía collaboraores nel área kárstico de Las Mañangas, nel conceyu Llanes, Asturies. Equí podrás atopar les reseñes y topografíes de les cavidaes esploraes, y dellos otros trabayos rellacionaos.

Este blog nace con el deseo de dar a conocer las exploraciones subterráneas desarrolladas por la S.E.B. Escar y diversos grupos de espeleología colaboradores en el área kárstica de Las Mañangas, en el concejo de Llanes, Asturias. Aquí podrás encontrar las reseñas y las topografías de las cavidades exploradas, y otros trabajos relacionados.

H.uente la Vallina

(MA-01)
Porrúa, Llanes, Asturies

Grupu d'Espeleoloxía Gorfolí, 2011

Desendolcu: 25 m.
Fondura: -9 m.

Coordenaes: 30T  X: 353904, Y: 4807990, Z: 33 m.s.n.m. (Dátum WGS84)

Asitiamientu: La H.uente la Vallina asitiase nel propiu pueblu de Porrúa, xunto al llavaderu.

Xeoloxía: Roca caliar, prieto y llaminao (formación Barcaliente) del Carboníferu superior (Namuriense).

Descripción: La poza la H.uente la Vallina ta anguaño cubierta por un casetu con verxa (pero ensin pesllar), empobinando l'agua la xurdencia per una canal, y asina mesmo pa una h.uente, pa un bebederu y pal llavaderu. Na poza dientro'l casetu, de 2 x 2 m., entama la galería somorguiada, siendo'l sifón retorcíu y estrechu (nun se crucen dos buceadores en nengún puntu) y en continua baxada. A -9 m. de fondura la galería tien continuidá per un meandru estrechu abondo, que nun permite'l pasu col equipu de merguyu. El agua'l sifón ta nidio, como xinebra na escala británica de visibilidá.

Hidroloxía: La H.uente la Vallina ye la xurdencia de mayor importancia del área de Las Mañangas xunto col Oyu'l Ríu Calabres, en Piedra. Esti de Vallina ye l'aguañaz del Ríu la Vallina (o Plimplón) que tributa a la mar a los pocos kilómetros, na Playa de Po. Nun queda nidio la rellación col ríu soterrañu de la Cueva la Vallina, d'un caudal muncho menor y réxime estacional.

Hestoria: La h.uente ye conocida d'antiguu, abasteciendo d'agua hestóricamente a Porrúa. El conxuntu arquitectónicu de h.uente, bebederu y llavaderu data de 1904, y foi recuperáu nos años 2001-2002 pol Muséu Etnográficu del Oriente d'Asturias, que tamién iguó un cartel desplicativu, onde afayamos el siguiente cantar: "Mozas que vais a Vallina / a la h.uente'n busca d'agua / con mandil y toquillina / con el rueñu y la h.errada".

Toponimia: El nome la h.uente fai referencia a la vallina ente'l llavaderu y la cueva homónima.

Bioloxía: Na segunda inmersión topamos dientro la cueva una anguila.

Andecharon nos trabayos: El primer tientu del Grupu d'Espeleoloxía Gorfolí a la h.uente foi'l 2 de mayu de 2011, merguyando Rafa Bernardo col sofitu de Antonio Lista y la fía, ya instalando 13 m. de llínia hasta 4'5 m. de fondura. El 15 de mayu complétase la esploración y topografíase, andechando esti día Fran Solís, Adrián González, Leopoldo Trabanco, Enol Bernardo, Rafa Bernardo y Xesús F. Manteca, merguyando los dos últimos. El testu la presente reseña ye autoría de Pablo Solares (S.E.B. Escar), y les semeyes que la illustren fízoles Leopoldo Trabanco.

- Topografía -



Asoleyao el 29 de xineru de 2012
- Esploración finalizada -